Ɓoláŋgí ɓwá ndoŋgámɛn á ɓána ɓá sáwá ɓá e ó ekombo á mbɛŋgɛ na ɓanedi ɓá mbóa á sáwá

Kíɛlɛ ní tómbí, ndoŋgámɛ́n ní kɔtɛ́lɛ́ diɓembá lá ɓanedi ɓá sáwá ɓá e ó lɔndɔ lá eɓoló ó mbɛŋgɛ a Frɛ̌nsi e jái na ɓána ɓá sǎwá. Nîn ndoŋgámɛ́n e tá ndé ó musúla mwá ɗǒn dí télámɛ́ ó ndáɓo á ɓekómbédí ɓá ɓélɛ́nɔ̄ ná Quai Branly Jacques Chirac ó Frɛ̌nsi, ó ɓwâm ɓwá léɛ dimbámbɛ́ na ɓenyɛŋgɛ ɓá mindi má ekombo ásū.

Jándá láō dí tá ndé sɛ́lɛ ɓolá ɓoláŋgí ɓwá jǔkea na kwésɛ lá eɓoló ábū ó nîn ŋgando a mǎkɔtɔnɛ̌ má mindi níndɛ́nɛ, ndé na kwálea pɛ́ ónyólá mambo má mātakisɛɛ́ mbóa á sáwá ótétena póndá.

Myǒm má mambo mí ombwáɓɛ, misomɛlɛ mí ɓoláɓɛ, m̀púlí na myano mí wánáɓɛ. Ná mɛ́nɛ́ pɛ́ na ekwálí á Dikolo, yéná é díá ndé eɓaŋgo a pényápényá ó miléma má ɓato ɓɛ́sɛ.

Mǎkɔtɔnɛ̌ má sáwá má Mbɛŋgɛ a Ɓakálá má tá ó diɓɛ́kɛ́lɛ́. Ɓána ɓá sáwá ɓá kɔ́di ɓá wú dikokɛ́ dikokɛ́ ó Íŋglǐsi na ó matóŋgó mɛ́sɛ̄ má Frɛ̌nsi.

Búkédí ɓá tá ndé :

• Nyédúɓé ESSOMB’A NDAMBWE Ruben, mwanedi a mundi mwá Sodiko ó mwaŋgá mwá ɓɛ́lɛ ɓɛ́lɛ, dikɔ́ŋgɛ lá m̀ɓóko mwá ɓanedi ɓá mɔpí mwá ewodí na m̀ɓapɛ mwá dikóŋgɛ lá jǎkɔtɔnɛ̌ lá mbóa á Sáwá ;

• Nyédúɓé NDOUMBE Emmanuel, mwanedi a mundi mwá Ɓonendale ɓá ɓosó, mutɔpedi a m̀ɓokó mwá ɓanedi ɓá mɔpí mwá ewodí, m̀ɓapɛ mwá mutiledi a m̀ɓóko mwá ɓanedi ɓá sáwá ;

• Nyédúɓé NDAME Oscar, nyámulólómá nyá Nyâsám nyá Póŋgó á Diɓómbádí ó mbɛŋgɛ ;

• Múnja á Nyâsám nyá mwaŋgá mwá Ewodi-Bwelé ;

• Múnja á Nyédúɓé nyá mundi mwá Ɓonendale.

Myɛndi mí lómáɓɛ ó m̀ɓóko másū míndɛ́nɛ kaná Ŋgóndó na ó jǎkɔtɔnɛ̌ lá ɓanedi ɓá mindi.

Dikóŋgɛ lá m̀ɓóko mwá ɓanedi ɓá mɔpí mwá Ewodi, a timbísɛ́lɛ ɓána ɓá sáwá ɓɛ́sɛ̄ ɓéná ɓá nɔŋgí ɗoŋgo ó ɓôn ɓojǎ ɓwá njaŋga dibíɛ́ na mɔŋgɛlɛ, ǰta lá masóma.

Níka ni oŋgwánɛ ná moto tɛ́ á sɔ̂ntanɛ ná póndá á kɔ́ lá iyɔ́ e tití pɛ́ ✊🏿.

Muɓoledi anyū nú sibísɛ́ nyólo

Prince Dicka Din II